आइज भी ग्राम सभा कर हंकवारी में बाजेला बन भंइसा कर सिंघ

मुंगेश्वर साहू :

झारखंड जंगल – झार वाला परदेस लागे. हिंया आदि काल से आदिवासी आउर सदान मनक वास हय आउर पुरखा परंपरा में उमन अपन जिनगी के बिताते आवत हयं. हिंया कर आदिवासी आउर सदान मनक परंपरा आहे लोक परंपरा. इमन अपन पुरखा कर बनाल देखाल डहर में चलते आवत हयं. हिंया कर आदिवासी सदान अपन पुरखा से चलेक वाला संसकिरति , सभ्यता आउर परंपरा के जियत राइख हयं. चाहे ऊ परब तिहर हो, गीत गोबिंद हो, सहिया मदइत हो, इया गांव कर बइठकी उठकी हो. ई सउब गांव में आइज भी उसने चलत हे जइसे पुरखा पाट में चलत रहे.

पहिल समय में जुग कर बिकास नि होई रहे से बेरा पुरखाक आदमी मन आपन जउरत कर चीज मनके बन-पहार से हें पूरा करत रहयं. झारखंड में बसेक वाला जंगली छेतर कर गांव-घर में आइज भी पुरखा मनक कई ठो चिन्हा, चीज बसुत मन पुरखा मनक इयाइद करवायला. आइज से लगभग सौ साल पहले कर बात हेके सिमडेगा जिला कर जलडेगा प्रखंड में जंगल झार से घेराल पैतानों गांव कर. हिंया आदिवासी परिवार कर पुरखा आदमी मन जंगल से बन भंइसा कर सिंघ पाए लाइन रहयं. ऊ सिंघ बेस मोटा आउर लंबा एकन रहे. उके उमन खोउब सोंच बिचार कइर के हंकवारी कर साधन बनाय देलयं.

गांव में कोई भी घटना चाहे बइठकी उठकी कर सूचना पोंहचाएक ले उके बजाय देले पूरा गांव कर आदमी जमा होई जात रहयं आउर इकर से गांव वाला मनके सुबिस्ता भी होई जात रहे काले कि दूरा दूरा खबर देक नि होत रहे. जलडेगा प्रखंड में ग्राम सभा कर बिकास ले काम करेक वाला लीड्स संस्था कर प्रखंड परियोजना समन्वयक आलोक कुमार बतायना कि पैतानो गांव में आइज भी वहे लखे चलन चलते आवत हे जइसे पुरखा में चलत रहे. ऊ गांव (पैतानो) में आदिवासी परिवार बागरा आहयं आउर ऊ मनमे बेस एकजुटता भी हय.

आइज भी ऊ बन भंइसा कर सिंघ ग्राम सभा अध्यक्ष सुजीत लुगुन ठीन बेस जतन से जोगाल आहे. जब भी गांव में कोई बिपइत आवेल चाहे जलदी पलदी आदमी जुटेक कर बात रहेल तो ग्राम सभा अध्यक्ष ऊ सिंघ के बजाय देवेना आउर देखते देखते गांव कर आदमी जमा होई जायना. सिंघ कर वजन तीन चाइर किलो कर हय. सिंघ कर भीतरे ढोड़री हय आउर सिंघक आगा बट दूई ठो टोका करल आहे. ओहे टोका में पानी रूइक के उके मुंह से बजाल जाएला. उकर आवाज इसन सुनाय जइसे मैदान में रनभेइर.

आइज जुग कर बिकास होलक बरन बरन कर साधन मनक निरमान होलक. मुदा झारखंड कर आदिवासी मनक अपन पुरखा कर परती पेरेम भाव आउर धरोहर के आगे बढ़ाएक कर सोंच हें इसन परंपरा के बचाय राइख हे. झारखंड कर कोना कोना में पुरखा कर इसन कतना चिन्हा मन हय मुदा जुग कर बिकास संगे इसन परंपरा मन केरमें केरमें लुइक-छिप जात हे जेके खोजक कर जउरत हय नावां पीढ़ी के.