My Mati: पातालपुरी रेरेञ दिसोम

संताली बाल कथा

डॉ सुनील मुर्मू

मित् दिसोम रे चांदराय ञुतुमानिच् हाड़ामे ताहेंकाना. उनीयाक् बाड़गे रे मित् मारां जानुम दारे ताहेंकाना. ओना जानुम दारे रे आडीगान रेरेञ को ताहेन ताहेंक् आ. आदो दिनाम् गे उनकु बाको पोटाक् ताहेंक् आ. सायबा ञुतुमानिच जुआन रेरेञ दो एटाक रेरेञ कोय धोमकाव बाड़ा को ताहेंक् आ. एटाक् रेरेञ को सेरेञ खान सोगें थिरूक् ए मेताकोवा. आर आच् सुमुं ए सेरेञा. मित् हाडा़म रेरेञ ए मेन केदा – “ ए बाबु! आबो जोतो गेबोन रेरेञ काना. आबोवाक् दो सेरेञ गे धोरोम काना. आर जुदी आम बाम सेरेञ ओचोवाकोवा, एनखान नुकु दो आड़ीस-आड़ीस तेगे को गोच् उतारोक् आ. आम जोतो गे सेरेञ ओचोवाको में.” खेचड़ावाते सायबा रेरेञे मेन गोक् केदा – “आम ढोडरो हाड़ाम दो थिर ताहेंन मेसे. आमाक् नाडरी मा खाराक् तेगे पेरेच मेनाक् तामा, आर आम चिका़ ते सेरेञ सानाम काना? आम बा़ड़तीम मेन खान नोवा डिढा़ड़ी दारे खोन दोले लागा मेयान्हाक.”

हाड़ाम रेरेञे थिर गोक् एना. आडीय भावनायेना. मेत दाक् कोताय जोरोगोक् एना. उनी ञेल ते मित मारां काकड़ा दो सुर हेच कातेय मेताक् देया – “ ए काका, चेत् एम भाबनाक् काना? इञ ताहेन तुलुच् आलोम चिन्ता़या. ञेलेत पेयाञ दिन गेपे काफायरियाक् काना. काका नोवा धारतीपुरी दो नोनकान गेया. नोडे दो नेयाव- तापाम, हिंसा-सूया़, आड़ीस-आपा़ड़ीस,बा़यरी -बा़पायरी, लेकान आयमा जीनीस मेनाक आ. नोवा धारतीपुरी रे दो एगेर-एपेगेर ताहेन गेया. जुआन होड़ ठेन दो दाड़े ताहेन आ. उन्कु सांव आम बाम दाड़ेक् आ. इञीञ बाडाया, ओत लातार रे मित् रेरेञ दिसोम मेनाक् आ. ओंडे दो एखेन रेरेञ गे मेनाक् कोवा. जोतो आ़डी सुक सुलुक तेको ताहेंना. ओंडे दो रेरेञ को होड़ लेका गे दों-लांगड़े को एनेच् आ. हाडा़म रेरेञ कोदो बोंगा कुड़ी लेकान रेरेञ ठेन को सेबा ओचो कोवा, जाते उनकु हाडाम विदा़ल रे जोतो दुक देया काते को ताहेंदाड़ेयाक् मा. ओना दो सारी गे, आ़डडी गे नापाय दिसोम काना.”

मोटा गे सांहेत आते हाड़ाम रेरेञे मेन केदा- “ बाबु. इञाक् उनाक् उमेर हुयेना. तिस रेहों नोंकान दिसोम बाबोत काथा बाञ आंजोमाकात् आ. आम चिका़ तेम बाडाय ञाम केदा?” काकडा़ होरोबोरोय मेन गोक् केदा- “ मित घुंघुरिया गुड़धाव जोहोच् मित भुगाक् रिञ बोलोलेन ताहेंक आ. आदो घुंघुरिया़ माञ आत् केदेया . लातार सेत् इञ कोयोक् केत खानीञ ञेल एदा, आडी मोंज रेरेञ दिसोम दो. आडी नापाय नापाय दारे को पेरेच मेनाक् आ. जोतो आपान-आपीन को सेरेञ जों काना. नावा हारा जुआन रेरेञ कोदो दों -लांगड़े सेरेञ को छुटा़वाना. आडी हाहाड़ा गीञ ठीका केदा. ओना तीञ मेताम कान ताहेंकाना. इञ हों जाहां तीस दुक रीञ ताहेन खान आतरा बोलोकाते सेरेञ आंजोम ते जीवीञ राड़ेच जों बाडा़य गेया.” हाडाम रेरेञ ओनका आंजोम ते मोने कोय गोटा गोक केदा. मेताक् देयाय- “ठीक गेया तोबे. देलां इदीकाञ मे, ओना रेरेञ दिसोम ते.”

काकड़ाय मेन केदा- “ ए काका, उडा़व काते सेनोक् दो बाय गानोक् आ. इञाक् देया रे आबोक् मे मा, इदीकामाञ देला.” आदो काकड़ा दो उनी रेरेञे देच केदेया आर भुगाक् रे इदी काते उनीय जोम केदेया. इना़तायोम दिन गे रेरेञ दिसोम ञुतुम ते मित-बार रेरेञ भुगाक् तेय सांबाव कोवा आरे जोम कोवा.

ओना तेको मेना जे आनखा नेयाव दो बाय जुतआ. बांखान रेरेञ लेका आबोस्ता हुयुक् आ. निजेम नेयाक् आ आर एटाग को ताक रे ताडांक को ताहेन आ. बाम पोटाक् खान बा़यरी दो आम चाबा रेगेको ताहेंना . सारी गे, सांवता-सोमाज रेहों हाड़ाम काकड़ा मेनाक् कोवा. उनकु उरूम काते उनकु खोन साहा रे ताहेन लाकती काना.

(असिस्टेंट प्रोफेसर, संस्कृत विभाग, सिंहभूम कॉलेज, चांडिल)